EK LADKA THA..

Kisi ke armano ko palko par sajaya karta tha..

ek masoom sa ladka tha..

mohabbat ke khwaab dekha karta tha..

Ek chehra banakar khayalon me

phir us chehre ko bheed me dhoonda karta tha..

kaisa pagal ladka tha

ek khayal ko dhunda karta tha..

Aksar banata reit ka mehal sahilon par

phir un mehalon me ghar apna basaya karta tha..

kaisa nadan ladka tha..

saahil ki mitti se ghar banaya karta tha..

Kai baar wo phulon se baatein karta

kuch keh kar unke kaano me

khud hi sharmaaya karta tha..

kaisa ek ladka tha..

phulon se bhi sharmaya karta tha..

Likh kar hatheli par koi naam hamesha

phir us naam ko mitaya karta tha

nasamajh dil par likha tha jo,

use haathon se mitaya karta tha..

Jane kahan kho gaya wo

abto aksar aaine me dhunda karta hun..

wo ladka jo aaina dekh

bewajah muskuraya karta tha..

Mohabbat ne hi tod diye

uske sab armaan

jinhe wo bade pyar se

palkon pe sajaya kara tha..

shayad duniya bhi bhul jaye use

par waqt na bhula payega..

ek masoom ladka tha..

khawaabon ke seher me raha karta tha.